തിരുവനന്തപുരം : അരുവിക്കര 86 എംഎൽഡി ജലശുദ്ധീകരണ ശാലയിൽ രണ്ടാം ഘട്ട നവീകരണം വിജയകരമായി പൂർത്തിയായി. അസംസ്‌കൃത ജല, ശുദ്ധജല പമ്പ് ഹൗസുകളിൽ 631 എച്പി, 770 എച്പി വീതം ശേഷിയുള്ള പുതിയ പമ്പുകൾ സ്ഥാപിച്ചു പമ്പിങ് പുനരാരംഭിച്ചു.
നാളെ രാവിലെയോടെ നഗരത്തിൽ ജലവിതരണം പൂർവ സ്ഥിതിയിലെത്തും. മൂന്നാം ഘട്ട നവീകരണം ജനുവരി 11ന് നടക്കും. ഈ ഘട്ടത്തിൽ 86 എം എൽ ഡി ശുദ്ധീകരണ ശാലയുടെ പ്രവർത്തനം ആറു മണിക്കൂർ നിർത്തിവയ്ക്കും. ഫെബ്രുവരി ഒന്നിന് നടക്കുന്ന നാലാം ഘട്ടത്തിൽ 86 എം എൽ ഡി ശുദ്ധീകരണ ശാലകളുടെ പ്രവർത്തനം 16 മണിക്കൂർ നിർത്തിവയ്ക്കേണ്ടി വരും.
നവീകരണത്തിന്റെ നാലു ഘട്ടങ്ങളും പൂർത്തിയാകുമ്പോൾ തിരുവനന്തപുരം നഗരത്തിൽ പ്രതിദിനം 10 ദശലക്ഷം ലിറ്റർ അധികജലം വിതരണം ചെയ്യാൻ കഴിയുമെന്ന് വാട്ടർ അതോറിറ്റി അറിയിച്ചു.
