തിരുവനന്തപുരം : ഭരണപരിഷ്കാര കമ്മീഷൻ ചെയർമാനും മലമ്പുഴ എം.എൽ.എയുമായ വി. എസ് അച്യുതാനന്ദന്റെ ആസ്തി വികസന ഫണ്ട് ഉപയോഗിച്ച് വാങ്ങിയ വെന്റിലേറ്റർ ജില്ലാ പഞ്ചായത്ത് പ്രസിഡന്റ് അഡ്വ കെ. ശാന്തകുമാരി ഡി.എം.ഒ ഡോ.കെ. പി. റീത്ത, ജില്ലാ ആശുപത്രി സൂപ്രണ്ട് രമാദേവി എന്നിവർക്ക് കൈമാറി.
കോവിഡ് -19 രോഗപ്രതിരോധ പ്രവർത്തനങ്ങൾക്കായി ഒരു കോടി രൂപയാണ് എം.എൽ. എയുടെ ആസ്തി വികസന ഫണ്ടിൽ നിന്നും ചിലവഴിക്കുന്നത്. ജില്ലാ ആശുപത്രി, എലപ്പുള്ളി ഗവ. ആശുപത്രികളിലേക്കായി 20 ലക്ഷം വകയിരുത്തി(ഓരോന്നിനും 10 ലക്ഷം വീതം) രണ്ട് വെന്റിലേറ്ററുകളാണ് നൽകുന്നത്. എലപ്പുള്ളി ആശുപത്രിയിൽ ഐ.സി.യു കെട്ടിട നിർമാണത്തിനായി 30 ലക്ഷം രൂപയും, മലമ്പുഴ മണ്ഡലത്തിലെ വിവിധ ആശുപത്രികളിൽ കോവിഡ് രോഗ പ്രതിരോധത്തിനായി 50 ലക്ഷം രൂപയുമാണ് അനുവദിച്ചത്.
ജില്ലാ പഞ്ചായത്ത് പ്രസിഡന്റിന്റെ ചേംബറിൽ നടന്ന പരിപാടിയിൽ എം.എൽ.എയുടെ പേഴ്സണൽ സ്റ്റാഫ് എൻ, അനിൽകുമാർ, സ്റ്റാഫ് അംഗം ശശി, കെ.എം.സി.എൽ പ്രതിനിധികൾ എന്നിവർ പങ്കെടുത്തു.
