തിരുവനന്തപുരം : സംസ്ഥാനത്ത് നിലവില് 14 പേര്ക്ക് കോവിഡ് 19 രോഗം സ്ഥിരീകരിച്ച സാഹചര്യത്തില് വലിയ ജാഗ്രത പുലര്ത്തി വരുന്നതായി ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്. 110 ലോക രാജ്യങ്ങളില് കോവിഡ് 19 രോഗം പടര്ന്നുപിടിച്ച സാചര്യത്തില് സംസ്ഥാനത്തെ വിവിധ ജില്ലകളിലായി 3313 പേര് നിരീക്ഷണത്തിലാണ്. ഇവരില് 3020 പേര് വീടുകളിലും 293 പേര് ആശുപത്രികളിലും നിരീക്ഷണത്തിലാണ്. സംശയാസ്പദമായവരുടെ 1179 സാമ്പിളുകള് പരിശോധനയ്ക്ക് അയച്ചിട്ടുണ്ട്. ഇതില് 889 സാമ്പിളുകളുടെ പരിശോധനാ ഫലം നെഗറ്റിവ് ആണ്. 213 സാമ്പിളുകളുടെ ഫലം ലഭിക്കാനുണ്ട്. നിലവില് സംസ്ഥാനത്ത് കോവിഡ് 19 രോഗം ബാധിച്ച 14 പേരാണുള്ളത്. ഇന്ന് പുതിയ പോസിറ്റീവ് കേസുകള് വന്നിട്ടില്ല. തിരുവനന്തപുരം, കോഴിക്കോട് മെഡിക്കല് കോളേജുകളില് സാമ്പിള് പരിശോധന ആരംഭിച്ചിട്ടുണ്ട്. പബ്ലിക് ഹെല്ത്ത് ലാബ്, തൃശൂര് മെഡിക്കല് കോളേജ്, രാജീവ്ഗാന്ധി ബയോ ടെക്നോളജി ഇന്സ്റ്റിറ്റിയൂട്ട് എന്നിവിടങ്ങളില് പരിശോധനയ്ക്കായി അനുമതി തേടിയിട്ടുണ്ട്. ഇതിനും കൂടി അനുമതി കിട്ടിയാല് വേഗത്തില് ഫലം ലഭിക്കുന്നതാണെന്നും മന്ത്രി വ്യക്തമാക്കി. ആരോഗ്യ വകുപ്പിന്റെ അവലോകന യോഗത്തിന് ശേഷം സംസാരിക്കുകയായിരുന്നു മന്ത്രി.
ഇറ്റലിയില് നിന്നും പത്തനംതിട്ടയില് എത്തിയ മൂന്നംഗ കുടുംബവുമായി സമ്പര്ക്കം പുലര്ത്തിയ 969 പേരെയാണ് കണ്ടെത്തിയത്. ഇതില് 129 പേരെ ഹൈ റിസ്ക് വിഭാഗത്തില്പ്പെടുത്തിയിട്ടുണ്ട്. ഇവരില് 13 ശതമാനം പേര് 60 വയസില് കൂടുതലുള്ളവരാണ്. അവര്ക്ക് പ്രത്യേക പരിചരണമാണ് നല്കുന്നത്. കോട്ടയത്ത് 60 പേര് കോണ്ടാക്ട് ലിസ്റ്റിലുണ്ട്. എറണാകുളത്ത് കോവിഡ് 19 സ്ഥിരീകരിച്ച് ചികിത്സയിലുള്ള മൂന്ന് വയസുകാരനുമായും മാതാപിതാക്കളുമായും സമ്പര്ക്കം പുലര്ത്തിയ 33 ഹൈ റിസ്കുള്ളവര് ഉള്പ്പെടെ 131 പേരെയും കണ്ടെത്തിയിട്ടുണ്ട്.
കോവിഡ് 19 ബാധിത രാജ്യങ്ങളില് നിന്നും കൂടുതല് പേര് കേരളത്തിലേക്ക് വരുന്നുണ്ട്. അതിനാല് തന്നെ എല്ലാ എയര്പോര്ട്ടുകളിലും നല്ല സ്ക്രീനിംഗാണ് നടക്കുന്നത്. തദ്ദേശസ്വയംഭരണ സ്ഥാപനങ്ങള് മുഖേന ഇത്തരത്തില് വന്നവരുണ്ടെങ്കില് കണ്ടെത്താനുള്ള ശ്രമങ്ങളും നടക്കുന്നുണ്ട്. സ്വമേധയാ റിപ്പോര്ട്ട് ചെയ്ത് വരുന്നവരും ഇപ്പോഴുണ്ട്. കൂടുതല് കേസുകള് വരുന്നതനുസരിച്ച് ചികിത്സ സൗകര്യങ്ങള് കൂട്ടുന്നതാണ്. നല്ല ലക്ഷണങ്ങളുള്ളവരുടെ സാമ്പിളുകളാണ് പരിശോധനയ്ക്കായി അയയ്ക്കുന്നത്.
കോവിഡ് 19 രോഗലക്ഷണങ്ങള് ഉള്ളവരും അവരെ പരിചരിക്കുകയും ചെയ്യുന്ന ആളുകള് മാത്രമേ മാസ്ക് ധരിക്കേണ്ടതുള്ളു. മാസ്ക് ഉപയോഗിക്കുന്നവര് അത് ഉപയോഗിക്കേണ്ട മാര്ഗങ്ങള് മനസ്സിലാക്കി ഉപയോഗിക്കേണ്ടതും ഉപയോഗശേഷം മാസ്കുകള് ശാസ്ത്രീയമായി തന്നെ സംസ്കരിക്കേണ്ടതുമാണ്. പൊതുജനങ്ങള് എന് 95 മാസ്കുകള് ഉപയോഗിക്കേണ്ടതില്ല. എവിടെയെങ്കിലും പോയി വന്നാല് സോപ്പ് ഉപയോഗിച്ച് കൈകഴുകിയാല് തന്നെ പല പകര്ച്ച വ്യാധികളില് നിന്നും രക്ഷ നേടാവുന്നതാണ്. സാനിറ്ററൈസര് ലഭ്യത കുറവ് പരിഹരിക്കാനുള്ള ശ്രമം നടത്തുന്നുണ്ട്.
രോഗലക്ഷണങ്ങളുള്ളവര് പരിക്ഷയെഴുതാന് പോകേണ്ടതില്ല. പരീക്ഷയെഴുതാന് വരുന്ന കുട്ടികള്ക്ക് പ്രത്യേക റൂമും സൗകര്യങ്ങളും സ്കൂള് അധികൃതര് തന്നെ ചെയ്തു കൊടുക്കേണ്ടതാണ്. വിദ്യാഭ്യാസ വകുപ്പിന്റെ സഹായത്തോടെ 40 ലക്ഷം കുട്ടികളില് നല്ല ബോധവത്ക്കരണം നടത്തിയിട്ടുണ്ട്. ജനപ്രതിനിധികളുടെ സഹകരണത്തോടെ നല്ല പ്രവര്ത്തനമാണ് നടത്തുന്നത്. അവസാന കോണ്ടാക്ട് ട്രെയിസ് വരെ പ്രവര്ത്തിക്കേണ്ടതുണ്ട്.
കോട്ടയം മെഡിക്കല് കോളേജില് ചികിത്സയിലുള്ള 85 വയസിന് മുകളില് പ്രായമുള്ള രണ്ട് പേര് ഹൈ റിസ്കിലുള്ളവരാണ്. ഇടയ്ക്ക് ആരോഗ്യ നിലയില് ചെറിയ വ്യത്യാസം വന്നിരുന്നെങ്കിലും ഇപ്പോള് തൃപ്തികരമാണ്. ആശുപത്രിയില് പ്രവേശിപ്പിക്കപ്പെട്ട മറ്റുള്ളവരുടെ ആരോഗ്യനിലയില് ആശങ്കയ്ക്ക് വകയില്ലെന്നും മന്ത്രി വ്യക്തമാക്കി.
ആരോഗ്യ വകുപ്പ് പ്രിന്സിപ്പല് സെക്രട്ടറി ഡോ. രാജന് എന്. ഖോബ്രഗഡെ, എന്.എച്ച്.എം. സ്റ്റേറ്റ് മിഷന് ഡയറക്ടര് ഡോ. രത്തന് ഖേല്ക്കര്, കെ.എം.എസ്.സി.എല്. എം.ഡി. ഡോ. നവജ്യോത് ഖോസ, ആരോഗ്യ വകുപ്പ് ഡയറക്ടര് ഡോ. ആര്.എല്. സരിത, ആരോഗ്യ വിദ്യാഭ്യാസ വകുപ്പ് ഡയറക്ടര് ഡോ. എ. റംലാബീവി, അഡീ. ഡയറക്ടര്മാരായ ഡോ. വി. മീനാക്ഷി, ഡോ. ബിന്ദു മോഹന്, സ്റ്റേറ്റ് പബ്ലിക് ഹെല്ത്ത് ലാബ് ഡയറക്ടര് ഡോ. സുനിജ, കോവിഡ് 19 സ്റ്റേറ്റ് നോഡല് ഓഫീസര് ഡോ. അമര് ഫെറ്റില്, എസ്.എ.ടി. ആശുപത്രി സൂപ്രണ്ട് ഡോ. എ. സന്തോഷ് കുമാര്, കെസാക്സ് പ്രോജക്ട് ഡയറക്ടര് ഡോ. ആര്. രമേഷ്, എസ്.എച്ച്.എസ്.ആര്.സി. എക്സി. ഡയറക്ടര് ഡോ. കെ.എസ്. ഷിനു, സംസ്ഥാന പകര്ച്ചവ്യാധി പ്രതിരോധ സെല് ഡയറക്ടര് ഡോ. പി.എസ്. ഇന്ദു എന്നിവര് യോഗത്തില് പങ്കെടുത്തു.
