തിരുവനന്തപുരം : കാട്ടാക്കട നിയോജക മണ്ഡലത്തെ സ്ത്രീ സൗഹൃദ മണ്ഡലമാക്കുന്നതിനായി ഐ.ബി.സതീഷ് എം.എൽ.എയുടെ നേതൃത്വത്തിൽ നടപ്പിലാക്കി വരുന്ന ഒപ്പം പദ്ധതിയുടെ ഭാഗമായി മണ്ഡലത്തിലെ വനിതകൾക്കായി തൊഴിൽ മേള സംഘടിപ്പിക്കുന്നു. അന്താരാഷ്ട്ര വനിതാ ദിനത്തിന്റെ പശ്ചാത്തലത്തിൽ ഒപ്പം പദ്ധതിയുടെ വാർഷികാഘോഷങ്ങളുടെ ഭാഗമായി 2023 മാർച്ച് 25 ന് കുളത്തുമ്മൽ ഗവ.എൽ.പി സ്കൂളിൽ വച്ചാണ് "ഒപ്പം ജോബ് ഫോർ ഹെർ" എന്ന പേരിൽ തൊഴിൽ മേള സംഘടിപ്പിക്കുന്നതെന്ന് ഐ.ബി.സതീഷ് എം.എൽ.എ അറിയിച്ചു.
രാവിലെ 9 മണിക്ക് ആരംഭിച്ച് വൈകുന്നേരം 4 മണിക്ക് പൂർത്തിയാക്കുന്ന തരത്തിൽ ഏകദിന തൊഴിൽമേളയാണ് സംഘടിപ്പിക്കുന്നത്. മണ്ഡലത്തിലെ 6 ഗ്രാമ പഞ്ചായത്തുകളുടെയും സർക്കാർ വകുപ്പുകളുടെയും കുടുംബശ്രീയുടെയും സ്വകാര്യ കമ്പനികളുടെയും സഹകരണത്തോടെ നടത്തുന്ന പ്രസ്തുത മേളയിൽ എല്ലാ പ്രമുഖ ബിസിനസ് മേഖലകളിലും ഉള്ള തൊഴിൽ ദാതാക്കളെ പങ്കെടുപ്പിച്ചുകൊണ്ട് അവർക്ക് ഉദ്യോഗാർത്ഥികളുമായി നേരിട്ട് സംവദിക്കാനും അഭിമുഖങ്ങൾ നടത്താനും ആവശ്യമായ സൗകര്യങ്ങൾ ഒരുക്കും. കൂടാതെ സ്വയം തൊഴിൽ തുടങ്ങാൻ ആഗ്രഹിക്കുന്ന സ്ത്രീകൾക്ക് സംരംഭകത്വ പരിശീലനവും, വിവിധ മേഖലകളിലെ വിദഗ്ധരെ ഉൾക്കൊള്ളിച്ചുകൊണ്ടുള്ള സെമിനാറുകളും ഉണ്ടായിരിക്കും. 18 വയസ്സ് പൂർത്തിയാക്കിയ വനിതാ ഉദ്യോഗാർത്ഥികൾക്ക് അനായാസമായി ഒപ്പം പദ്ധതിയുടെ വെബ്സൈറ്റിലൂടെ തികച്ചും സൗജന്യമായി തൊഴിൽ മേളയിൽ പങ്കെടുക്കുന്നതിന് രജിസ്ട്രേഷൻ നടത്തുന്നതിനുള്ള ക്രമീകരണം സജ്ജമാക്കിയിരുന്നു.
കാട്ടാക്കട നിയമസഭാ മണ്ഡലത്തിന്റെ പരിധിയിൽ താമസിക്കുന്ന വനിതകൾക്ക് മാത്രമായിരിക്കും അവസരം ലഭിക്കുക. 45 വയസ്സാണ് അപേക്ഷിക്കുവാനുള്ള ഉയർന്ന പ്രായ പരിധി. വെബ്സൈറ്റ് മുഖേന ഇതുവരെ രജിസ്റ്റർ ചെയ്യാൻ കഴിയാത്തവർക്ക് തൊഴിൽ മേള സംഘടിപ്പിക്കുന്ന മാർച്ച് 25 ന് രാവിലെ 9 മണി മുതൽ 10 മണി വരെ സ്പോട്ട് രജിസ്ട്രേഷനും ഉണ്ടായിരിക്കുമെന്ന് ഐ.ബി.സതീഷ് എം.എൽ.എ അറിയിച്ചു.
