മനാമ : ബഹ്റൈനിൽ മാർബിൾ ഇറക്കുന്നതിനിടെ മാർബിൾ പാളി അടർന്നു വീണതിനെ തുടർന്നുണ്ടായ അപകടത്തിൽ ഒരു മലയാളി മരിക്കുകയും നാലു മലയാളികൾക്ക് പരിക്കേൽക്കുകയും ചെയ്തു. ബഹ്റൈനിലെ ആലിബൂരിയിൽ ഞായറാഴ്ച കാലത്താണ് സംഭവം. തിരുവനന്തപുരം നെയ്യാറ്റിൻകര മാരായമുട്ടം കല്ലിടാന്തി സി.എസ്.ഭവനിൽ നിഷാന്ത് ദാസ് (27) ആണ് മരിച്ചത്.
ഒമാനിൽ നിന്നും ക്കൊണ്ടുവന്ന മാർബിൾ സ്വകാര്യകമ്പനിയിൽ ഇറക്കുന്നതിനിടെ മാർബിൾപാളി പൊട്ടിവീണാണ് അപകടമുണ്ടായതെന്നാണ് റിപ്പോർട്ട്. നിഷാന്ത് ദാസ് സംഭവ സ്ഥലത്തു വെച്ചു തന്നെ മരണപ്പെട്ടു. പരിക്കേറ്റ നാലു പേരെയും ബി.ഡി.എഫ് ആശുപത്രിയിൽ പ്രവേശിപിച്ചിരിക്കുകയാണ്. ഇവരിൽ രണ്ടുപേരുടെ പരിക്ക് ഗുരുതരമല്ല. ഇവരെ പ്രാഥമിക ശുശ്രൂഷ നൽകി ഉടൻ ഡിസ്ചാർജ്ജ് ചെയ്യുമെന്ന് ബന്ധപ്പെട്ടവർ അറിയിച്ചു.
മരണമടഞ്ഞ നിഷാന്ത് ദാസ് 2013 ലാണ് ബഹ്റൈനിൽ എത്തിയത്. കുടുംബം നാട്ടിലാണ്. മൃതദേഹം സൽമാനിയ ആശുപത്രി മോർച്ചറിയിലേക്ക് മാറ്റി. മൃതദേഹം നാട്ടിലെത്തിക്കാനുള്ള നടപടികൾ ആരംഭിച്ചിട്ടുണ്ട്.
